Monday, May 23, 2011

أنا مش عايز مجلس عسكر يحكمني

طب بص بقى

بالصلاة على النبي كده يامجلسنا ياعسكري

أنا بقولك لأ

أنا ضد إنك تمسك بزمام السلطه في البلد، حتى لو فتره إنتقاليه 3 أيام

يعني بالذمه ياناس، واحد يفضل يضربني 60 سنه، وبعدين يوم ما آجي أضربه، يقولي تعالى أعالجك على حسابي؟

كيف تعقلون؟؟

أنا ضد التعذيب والتحرش في سجونك

أنا ضد الإعتقالات لكل من هب ودب وقال لأ لسيادتك

أنا أبويا رباني أقول الحق، وأعيش حر

أنا الألتراس علمني، لما حد ييجي عليا عافيه، آخد منه حقي بدراعي

أنا نزلت الثوره لإني ماقبلتش أعيش نص بني آدم

أنا نزلت الثوره لإني رفضت أسكت عن الظلم في بلدي للناس، حتى لو كان مابيضرنيش شخصيا

أنا نزلت الثوره عشان أشوف مصر أحسن

أنا نزلت الثوره عشان أنهي حكم "إنقلاب 23 يوليو" اللي إستمر 60 سنه

أنا نزلت الثوره عشان حقي في إني أقول لأ للي مايعجبنيش

أنا مش عايز مجلس عسكري يعتقلني من بيتي ويلغي حرمته زي ما كلاب العادلي كانوا بيعملوا

أنا مش عايز مجلس عسكري يعذب شباب مصر في السجون ويهتك أعراضهم

أنا مش عايز مجلس عسكري يمشيني على مزاجه ويتحكم فيا

أنا مش عايز مجلس عسكري ينزلي بيان يتكلم فيه عن قوى الشر والظلام

أنا مش عايز مجلس عسكري يصدر أوامر للجيش بإنهم يشوفوا الشعب بيتضرب ويتإذي ويسكتوا

أنا مش عايز مجلس عسكري يصالحني على المخلوع وزبانيته

أنا مش عايز مجلس عسكري يسلمني للشرطه

أنا مش عايز مجلس عسكري يطلع يضحك عليا ع التليفزيون ويسخر مني ويقولي أزمه إقتصاديه وأزمة قمح وفياجرا وكوندومز

أنا حر يا أخي.. أنا مش حابب المجلس العسكري

أنا مش حابك يامجلس.. هي عافيه ولا لوي دراع؟ ولا عايزين تمشوها غابه والبقاء يبقى للأقوى؟

وإن كان هوه ده الإستقرار اللي عايزينوا، فأنا كاره أم الإستقرار على طريقتكوا

أنا نازل يوم 27.. أيوه أنا نازل يوم 27 زي ماسمعتوا

وهعبر عن رأيي وأقول بكل حريه

أنا مش عايز مجلس عسكر يحكمني

أنا حر.. إتولدت حر، ويا إما أكمل حياتي حر، أو أموت دون ذلك

في ال 27 موعدنا، والمجد للثورجيه إلى أبد الآبدين :)

2 comments:

  1. أهى دى رجالة الثوره و لا بلاش .. و بلاش خضوع و خنوع تانى احنا اتغيرنا

    ReplyDelete