ليه نازلين يوم 27؟

الموضع بدأ بشوية دعوات ع الفايس بوك

تعالوا ننزل ننكد ع الشرطه في عيدهم زي مابينكدوا علينا حياتنا

ناس كتير بدأت تستجيب لأسباب مختلفه

فيه النشطاء اللي نزلوا عشان دي طبيعتهم

وفيه الناس اللي نزلت عشان زهقوا من حال البلد

وفيه الناس اللي نزلت عشان تاخد طارها البايت من الشرطه وتاخد حقها وكرامتها، وأنا منهم

وكل واحد نزل لحاجه معينه في دماغه وعقله

المظاهرات إبتدت سلميه وبأعداد قليله جدا في الساعات الأولى من صباح ال 25 ، وبدأت تكبر بسرعه رهيبه وتلاقي تجاوب شديد من الناس، لإن وبكل بساطه الهتاف الرئيسي ساعتها كان فعلا الناس محتاجاه وحاساه:

عايزين، حريه.. عداله إجتماعيه

عملنا مظاهرات جميله، إرتكب النظام أول حماقه في بداية سلسله من الحماقات المتواليه وضرب المتظاهرين

الناس إبتدت تهيج

نزلوا يوم 27 ياخدوا حق كرامتهم اللي بتتكسر بقالها مئات السنين، بس كانت أول مره العالم يشوفنا وإحنا مكسورين

ف نزلنا نجيب حقنا

نزلنا وحاربنا على مدار 17 يوم كاملين مظاهرات ولجان شعبيه وإعتصامات وإضرابات وإلى آخره

وضربنا للعالم مثال كيف تصنع الثوره، ووريناهم معدن الشعب المصري الحقيقي

لحد هنا والثوره كانت جميله جدا وماشيه بخطى ثابته لحد ماحققت أول أهدافها

كسرت رمز القمع اللي هوه الشرطه، وبعدها كسرت رمز الحكومه اللي هوه المخلوع حسني مبارك

بس المشكله اللي ظهرت بعد كده هي إنعدام الوعي السياسي، وده ناتج عن سنين من التغييب والتجهيل المتعمد للشعب

بعد ماكسرنا الرموز، الناس مابقيتش فاهمه سبب لبقائنا في الميدان

وبسهوله إتضحك عليهم بعجلة الإنتاج وتوك توك الإستقرار والفتنه الطائفيه وإلى آخره

طيب إدوهم فرصه، سيبوا الجيش يحكم شويه

طب لو ماعجبكوش الوضع بعد كده، إنزلوا التحرير تاني، هو الميدان هيطير يعني

ومع الضغط والوقت قرر المعتصمين يفضوا إعتصامهم "مؤقتا" بناءا على الجمله اللي فاتت دي

ولو ماعجبكوش الوضع بعد كده، إنزلوا التحرير تاني، هو الميدان هيطير يعني

 صبرنا شهر، وإثنين، وثلاثه

رغم إن حصل تجاوزات كتير من الجيش، بس سكتنا وقولنا معلش، العجله ماينفعش تقف.. ده بإفتراض إن الإعتصامات هيه اللي بتوقف العجله طبعا

بس إنت ممكن تسكت وتعديها مره، إثنين، خمسه.. لكن أكتر من كده معلش، تسمحلي أقولك

Game Over

أنا ماعجبنيش الوضع في ال 3 شهور دول

ومش أنا لوحد، 90% من اللي نزلوا يوم 25 و 28 يناير، مش عاجبهم الوضع

ونازلين يوم 27 زي ماتفقنا

نازلين عشان نسرع عجلة تحقيق مطالب الثوره، اللي هيه أهم بمليون مره من عجلة الإنتاج

نازلين عشان مش عايزين مجلس عسكر يتحكم فينا

مش عايزين جيشنا يقف يتفرج علينا وإحنا بنتضرب عشان يلتزم الحياديه، وأقصى رد فعل يعمله هوه مكالمة تليفون فحواها: التهريج اللي بيحصل ده يقف فورا.. لا ياشيخ؟؟

نازلين عشان مش عايزين أمن مركزي يعتدي على مواطنين تاني

نازلين عشان مش عايزين سفاره للصهاينه على أرضنا

نازلين عشان اللي سرق فلوسنا لازم يتحاكم، وناخد حقوقنا منه

نازلين عشان اللي قتل عيالنا لازم يتحاكم، وناخد قصاصنا العادل منه

نازلين عشان اللي روج علينا الأكاذيب وهاجم الثوار وطلع علينا الإشاعات لازم يتمحي

نازلين عشان اللي عملناه عشان نسترد كرامتنا يوم 25، والتضحيات والشهدا اللي راحوا مننا، مايروحوش هدر

نازلين 27 عشان ناخد حقوقنا السياسه وحرياتنا كامله مكمله، عشان نقدر بعدها ننهض بمصر إقتصاد وصناعه وزراعه وتعمير وعلم وفي كل المجالات

نازلين عشان نغير سياسة المجلس العسكري ونجبره على الإنصياع لرغبات الشعب.. مش نازلين عشان نحتك بالجيش، لإن المجلس العسكري دلوقتي قدامنا هوه رئيس الجمهوريه، مش ممثل الجيش

نازلين عشان اللي حصل في الكام شهر اللي فاتوا، مش على مستوى تطلعاتنا إطلاقا

ونقطه مهمه جدا لازم كل الناس تفهمها

الثوره مانتهتش بخلع مبارك، الثوره لا زالت مستمره، وممكن تاخدلها 5 سنين كمان ع الأقل

عشان تبدأ تمارس حرياتك، ويبدأ الوعي السياسي ينتشر في بلدك

عشان تبدأ الناس تنضف في تعاملاتها وتبقى أحسن

 عشان نبدأ نقضي ع الرشاوي والمحسوبيه

عشان نتخلص من رواسب مئات السنين من الجهل والفساد

عشان نبدأ نقضي على الفقر

عشان نبدأ نقوي الإقتصاد والجيش ونبقى دوله عظمى

عشان وعشان وعشان

ونزولنا يوم 27 مش ثوره جديده ولا حاجه منفصله عن 25 يناير.. دي مجرد تكمله وإعادة إحياء للثوره، وتنبيه إن إحنا مش نايمين ومراقبين كل خطوه وتحرك، وإن عيونا مش هتنام عشان تحمي مصلحة مصر ونشوفها في أحسن صوره ممكنه

عشان كده أنا نازل يوم 27..عشان أحمي ثورة مصر