جهاز الأمن الوطني.. إلى أين؟؟

كعادة ما قبل الثوره

ورغم إن إحنا رفعنا الحرج عن الجميع وأقتحمنا، أو "إتسهل دخولنا" لمقرات أمن الدوله في المحافظات

كعلامه وإشاره لوجوب محو جهاز أمن الدوله الفاسد من الوجود

وعيشنالنا كام يوم حلوين بستمتعين بحرياتنا الكامله من غير ماحد يحجرها علينا

لحد مابدأت تظهر الوجوه القذره القميئه في المظاهرات من تاني

وأمن الدوله اللي شكله كده راجع في زي الأمن الوطني بنفس أساليب زمان في إهانة المواطنين وقمع الحريات وغيره وغيره وغيره

طيب، الغرض من التدوينه دي حاجتين

أول حاجه: كيف تعرف مخبر الأمن الوطني؟

1-هتلاقيه واحد في آواخر ال 30 غالبا

2-شكله تحس إنه فقير أو معفن نوعا ما

3-هتلاقيه ماسك موبيل نضيف فشخ لا يتناسب مع حالة ملابسه الرخيصه

4-وهو بيصور هتلاقيه بيركز جدا على الوشوش، مش بيصور المشهد العام

5-مظهره العام، مش شكل واحد نازل المظاهره عشان يتظاهر

6- لو ركزت معاه، هتلاقيه مابيهتفش أبدا

طبعا فيه حاجات تانيه كتير ممكن تدلك على مخبر أمن الدوله

طيب السبب الثاني للتدوينه دي.. إنك لو شوفت أي واحد حسيت إنه مخبر أمن دوله، تعمل حاجه من الإتنين

يا إما تمنعه يكمل تصوير

يا إما تصوره وهوه بيصور وترفع الصوره ع النت

في كلتا الحالتين.. الموضوع ده لازم يتحطله حد، ومخبرين الأمن الوطني مش من حقهم يصوروا المتظاهرين تمهيدا لأي تصرف غير شرعي ممكن يعملوه بعد كده مع الناس اللي بتتصور وممكن تتاخد بعدها ومايتعرفش عنها حاجه

من الأمن الوطني لأمن الدوله.. ياقلبي لا تحزن