ديما كنت بتسائل عن سبب عشق بعض الناس لموسيقى الهاوس والترانس والميتال وغيرها من أشكال الموسيقى الصاخبه.. شخصيا ماكنتش باهتم بأنواع المزيكا دي, كنت ديما ببص للمزيكا على إنها الموسيقى الكلاسيكيه الهادئه في الأغاني الرومانسيه اللي بتعرض بدوام كامل على قنوات الأغاني المتعدده.. لكن مع مرور الوقت, إبتديت أكتشف متعة الصخب اللي بتنقلك لعالم تاني لدرجة إنك ممكن توصل لفقدان السيطره على حواسك وذاتك.. جرب كده في يوم تدخل أوضتك وتقفلها عليك كويس, وهات سماعات صوت ضخمه, شغل مازيكا هاوس وعللي الصوت ع الآخر, وبعدها غمض عنيك وإبدا حرك جسمك مع الإيقاع, إرسم في خيالك لوحات فنيه وألوان..مع مرور الوقت هيبدأ ينتابك شعور غريب, كأنك آخر إنسان على سطح الأرض, وداخل معركه مع ذاتك, بتوجه الضربات لحواسك الواحده تلو الأخرى.. إلى أن تصل إلى القمه, قمة العالم الآخر.. اللي قد يعتبرها البعض هي قاع عالمنا هذا, بس مش مهم.. بعد ماتقفل المازيكا, ويغمى عليك من شدة إرهاق حواسك.. هتصحى تاني يوم الصبح منتشي, بتجربه جديده, وحاله روحيه مش كتير قدروا يوصلولها.. هتكون وصلت بالفعل, إلى اللانهائيه وما وراء البحار
No comments:
Post a Comment